Мэтамі начной атакі былі аб’екты ўкраінскага ВПК. Пра гэта заявілі ў Міністэрстве абароны Расіі.
«Сёння ноччу Узброенымі сіламі Расійскай Федэрацыі нанесены групавы ўдар высокадакладнай зброяй паветранага, наземнага і марскога базавання, а таксама ўдарнымі беспілотнымі лётнымі апаратамі па аб’ектах вайскова-прамысловага комплексу Украіны ў Кіеўскай вобласці і Запарожжы.
Мэта удараў дасягнутая. Усе прызначаныя аб’екты пабітыя», — гаворыцца ў паведамленні Мінабароны РФ.
Нагадаем, у расійскім вайсковым ведамстве традыцыйна сцвярджаюць, што не наносяць удары па цывільных аб’ектах і жылых раёнах.
У ноч на 17 чэрвеня Расія для ўдару па Украіне задзейнічала 440 дронаў і 32 ракеты, па Кіеве і ваколіцах было выпушчана 175 беспілотнікаў, больш за 14 крылатых і прынамсі дзве балістычныя ракеты. Адна з ракет ва ўкраінскай сталіцы трапіла ў жылы шматпавярховік, цалкам разбурыўшы адзін пад’езд. Таксама ў Кіеве былі знойдзеныя фрагменты касетных боепрыпасаў, якія выкарыстоўваюцца для максімальнага паражэння.
Выбухі мінулай ноччу гучалі і ў Адэсе, Запарожжы, Чарнігаўскай, Жытомірскай, Кіраваградскай, Мікалаеўскай і Кіеўскай абласцях. У выніку атакі ў Кіеве загінула 14 чалавек, больш за 100 атрымала раненні. Пад заваламі разбуранага дома могуць знаходзіцца ад чатырох да 14 чалавек, паведаміў кіраўнік Кіеўскай абласной ваеннай адміністрацыі Цімур Ткачэнка.
У Адэсе — адзін загінулы і 17 параненых.
18 чэрвеня ва ўкраінскай сталіцы абвешчаны днём жалобы.
