Маштабнае адключэнне святла на ўсёй тэрыторыі Пірэнэйскага паўвострава ў красавіку адбылося праз тое, што аператар энэргасістэмы Іспаніі (REE) няправільна разлічыў патрэбы краіны ў электраэнергіі. Да такой высновы прыйшло ўрадавае расследаванне, піша Reuters.
Міністр энергетыкі Іспаніі Сара Аагесэн заявіла, што 28 красавіка, у гадзіны пік, аператар не задзейнічаў дастатковай колькасці цеплавых электрастанцый. Гэта і стала прычынай ланцуговай рэакцыі, якая прывяла да збою.
«У сістэме не хапала магутнасці для дынамічнага кантролю напружання», — сказала чыноўніца.
Паводле яе словаў, аператар палічыў, што ўключаць дадатковыя электрастанцыі ў дзённыя гадзіны не трэба — іх запуск быў запланаваны толькі на раннюю раніцу.
Блэкаўт доўжыўся некалькі гадзін па ўсёй Іспаніі і Партугаліі, выклікаў транспартны калапс у гарадах і заспеў тысячы людзей у захраслых цягніках і ліфтах. У справаздачы таксама адзначаецца, што некаторыя электрастанцыі, абавязаныя па законе рэгуляваць напружанне ў сетцы, не справіліся са сваёй задачай.
«Яны мусілі кантраляваць напружанне, і больш за тое — ім за гэта плацілі. Але ва ўмовах высокага напружання яны не паглынулі ўвесь рэактыўны ток, як чакалася», — дадала міністр.
Электрасеткі краін ЕС падтрымліваюць частату 50 Гц — нават невялікія адхіленні могуць пашкодзіць абсталяванне і інфраструктуру. Для гэтага энергакампаніі павінныя аператыўна падладжваць выпрацоўку электрычнасці ў залежнасці ад попыту, а аператар сеткі адсочвае сітуацыю ў рэальным часе і дае ім сігналы.
Пры гэтым, са словаў Аагесэн, следства не выявіла прыкмет кібератакі.
Нагадаем, шэраг СМІ таксама сцвярджаў са спасылкай на аператара энергасістэмы Партугаліі, што ў масавым адключэнні нібыта вінаватая «рэдкая атмасферная з’ява», а менавіта экстрэмальныя ваганні тэмпературы ва ўнутраных раёнах Іспаніі.