Асабістыя пераводы беларусаў у студзені — сакавіку гэтага года дасягнулі рэкорднага сезоннага значэння, перавысіўшы дакавідны ўзровень. Пра гэта піша Myfin.by са спасылкай на звесткі Нацбанка.
У цэлым атрыманыя асабістыя пераводы ў першым квартале склалі 250,4 млн даляраў. Гэта на 30,1% больш, чым за такі ж перыяд 2024-га. Для параўнання: у чацвёртым квартале мінулага года гэтая сума складала 258,6 млн даляраў.
Так, паступленні ў выглядзе чыстай аплаты працы (за вылікам падаткаў і іншых выдаткаў) у студзені — сакавіку гэтага года выраслі на 33,6% у параўнанні з такім жа перыядам 2024-га — да 145,5 млн даляраў. Пры гэтым асабістыя пераводы дадалі за гэты час 25,7% (да 104,8 млн): у тым ліку грашовыя адпраўленні людзей, якія працуюць, — 19,3% (да 89,5 млн), а іншыя трансферты паміж хатнімі гаспадаркамі павялічыліся ў 1,8 разу (з 8,5 млн да 15,3 млн даляраў).
Нагадаем, аб’ём асабістых пераводаў, якія паступаюць у Беларусь, прыкметна скараціўся пасля пандэміі. Калі ў 2017 годзе іх сума дасягала рэкордных 1 млрд 112,7 млн даляраў, то ў 2020-м — усяго 740,8 млн, у 2022-м — 1 млрд 106,6 млн, а ў 2024-м — 929,4 млн. Часткова такая дынаміка абумоўленая складанасцямі з пераводам грошай і ростам выдаткаў на камісіі і канвертаванне валюты. Некаторыя папулярныя міжнародныя сістэмы пераводаў не працуюць у Беларусі, частка айчынных банкаў былі вымушаныя абмежаваць ці спыніць выкарыстанне SWIFT для валютных плацяжоў. Тым не менш цалкам транспамежныя пераводы паступова растуць, прычым часткова іх патокі пераарыентаваліся на іншыя краіны і новыя сэрвісы.
Якая сітуацыя з пераводамі за мяжу
У сваю чаргу адпраўленыя за мяжу асабістыя пераводы ў першым квартале гэтага года выраслі ў 2,3 разу ў параўнанні са студзенем — сакавіком мінулага года: 26,6 млн, да 60,3 млн даляраў. Гэта таксама сезонны рэкорд. З гэтай сумы чыстая аплата працы склала 43,2 млн даляраў. Гэта ў 3,6 разу больш, чым годам раней. А асабістыя трансферты за гэты час выраслі на 16,3% — да 17,1 млн даляраў.
Чытайце таксама
