У Літве грамадзянін Расіі выскачыў з транзітнага цягніка Адлер — Калінінград і знік. Яго шукаюць памежнікі, падняты верталёт літоўскай Службы аховы дзяржмяжы, аднак пакуль месцазнаходжанне ўцекача не выявілі, піша Delfi.
У Літве ідуць пошукі грамадзяніна Расіі 2004 года нараджэння, які выскачыў з транзітнага цягніка Адлер — Калінінград (адзначым, ён ідзе ў тым ліку праз тэрыторыю Беларусі).
Паводле інфармацыі паліцыі, інцыдэнт адбыўся раніцай 17 чэрвеня: прыкладна за 25 хвілін да прыбыцця цягніка на станцыю Кібартай правадніца заўважыла адчыненыя дзверы вагона і паведаміла пра гэта літоўскім памежнікам. Мужчыны ў цягніку ўжо не было.
На пошукі ўцекача паднялі верталёт літоўскай памежнай службы, які аглядаў чыгуначную лінію, што вядзе ў Калінінградскую вобласць. Ён знаходзіўся ў паветры каля трох гадзін, але слядоў расіяніна знайсці не ўдалося.
Як паведамілі ў Службе аховы дзяржмяжы Літвы, у расіяніна былі ўсе неабходныя дакументы, ён легальна ехаў праз тэрыторыю краіны транзітам. Матывы яго ўчынку невядомыя.
У дачыненні да маладога чалавека ўжо распачатае адміністрацыйнае расследаванне. За парушэнне яму пагражае штраф ад 70 да 300 еўра, а пасля затрымання яго плануюць выправадзіць з краіны.