Невядомыя прадстаўляюцца супрацоўнікамі расійскага медыя ў выгнанні Port і спрабуюць наняць фатографаў для здымкі падчас сустрэчы са Святланай і Сяргеем Ціханоўскімі ў Варшаве 26 чэрвеня. Пра гэта піша Port.
У Port адзначаюць, што некалькімі днямі раней з рэдакцыяй таксама звязваліся невядомыя і спрабавалі наняць журналістаў для «інтэрв'юявання аднаго чалавека» ў Вільнюсе.
Цяпер жа з рэдакцыяй Port звязалася некалькі журналістаў, да якіх звярнуліся людзі, што прадстаўляюцца супрацоўнікамі рэдакцыі. Пад нікамі «Марiя Габдуллина» і «Татьяна Лебедева» яны спрабавалі наняць чалавека, які здыме ўсіх, хто прыйдзе на сустрэчу са Святланай і Сяргеем Ціханоўскімі, якая адбудзецца 26 чэрвеня ў Варшаве.
Абедзве «дзяўчыны» называлі сябе журналісткамі Port. За працу яны прапаноўвалі аплату сумай 500 злотых і 100 еўра.
«Марiя» сцвярджала, што жыве ў Вільнюсе і працуе «пазаштатна». У сваіх паведамленнях «дзяўчына» дапускала памылкі і некалькі разоў пісала пра сябе ў мужчынскім родзе.
Адзін з тых, каго спрабавалі ў якасці фатографа наняць «супрацоўнікі рэдакцыі», у размове з Port дапусціў, што пад выдуманымі імёнамі людзям пішуць сілавікі.
«Перад буйнымі івэнтамі беларускай апазіцыі так рэгулярна шукаюць. Хутчэй за ўсё — беларускія спецслужбы, але, можа, і расійскія», — дапусціў суразмоўца.
У рэдакцыі выдання падкрэслілі, што не шукаюць фатографаў і аператараў.
Пад нікам «Татьяна Лебедева» некаторым прапануюць пафатаграфаваць сустрэчу з Ціханоўскімі для «Гуманітарнай установы» БАЗА"" (так называецца тэлеграм-канал, звязаны з ГУБАЗіК). Пра гэта «Медыязоне» расказаў адзін з беларусаў, якому паступіла прапанова «падпрацаваць».