Сітуацыя ва Украіне патрабуе рэагавання, пра гэта, як піша Bloomberg, у Гаазе заявіў прэзідэнт ЗША Дональд Трамп.
Агенцтва са спасылкай на сваю крыніцу паведамляе, што Трамп на закрытым паседжанні з калегамі — лідарамі NATO заявіў, што неабходна нешта рабіць з Украінай, бо сітуацыя там, як ён выказаўся, «цалкам выйшла з-пад кантролю».
Паводле крыніцы, гэты каментар быў расцэнены як пазітыўны знак узаемадзеяння з Украінай з боку прэзідэнта ЗША.
Як раней паведамлялі СМІ, 25 чэрвеня на палях саміту NATO запланаваная сустрэча Трампа з Зяленскім. Сам Трамп заявіў журналістам, што будзе абмяркоўваць з прэзідэнтам Украіны «відавочнае».
«Мы абмяркуем відавочнае… Абмяркуем яго цяжкасці. У яго ёсць невялікія цяжкасці. Зяленскі — добры хлопец. Сёння я з ім сустрэнуся. Не ведаю. Думаю, што мы будзем абмяркоўваць Украіну».
Трамп таксама дадаў, што шмат размаўляў з Уладзімірам Пуціным.
«Ён прапанаваў, як вы ведаеце, дапамогу з Іранам. Я сказаў, што мне не патрэбная дапамога з Іранам, мне патрэбная дапамога з Расіяй. Я сказаў: зрабі ласку, дапамажы нам з Расіяй, а не з Іранам. Але ён быў вельмі прыемны», — адзначыў Трамп.
Нагадаем, 24−25 чэрвеня ў Гаазе праходзіць саміт лідараў краін NATO.