Фота і відэа таго, як сямейная пара ў Кіеве стаіць ля пад’езда цалкам разбуранага пралёта жылога дома, абляцелі ўвесь свет. Пазней стала вядома, што пад абломкамі знаходзіцца іх 31-гадовы сын. Бацькі ўвесь дзень дзяжурылі ля развалін, спадзеючыся, што іх дзіця выратуюць. Але цуду не здарылася.
Цела 31-гадовага Дзмітрыя Ісаенкі ратавальнікі дасталі з-пад завалаў дома ў Саломенскім раёне Кіева ўвечары 17 чэрвеня.
Дзмітрый вучыўся ў магістратуры ўкраінскага дзяржаўнага ўніверсітэта імя Міхаіла Драгаманава на факультэце фізічнага выхавання, спорту і здароўя. Захапляўся стэндапам, хадзіў у горы.
«Яму быў усяго 31. Малады, светлы, добры. Дзмітрый быў добрым сябрам, годным сынам, натхнёным чалавекам… Ён жыў, вучыўся, верыў у жыццё — пакуль яго не забрала вайна», — гаворыцца на старонцы ўніверсітэта ў Facebook.
Усяго ва ўкраінскай сталіцы ў выніку расійскага абстрэлу 17 чэрвеня загінула 28 чалавек, 23 з іх — у разбураным пад’ездзе дома ў Саломенскім раёне. Яшчэ больш за 140 атрымалі раненні. Пошукава-выратавальная аперацыя ў Саломенскім раёне Кіева доўжылася больш за 39 гадзін.
Расійскае Мінабароны заявіла, што «высокадакладнай зброяй» нанеслі ўдар па аб’ектах ваенна-прамысловага комплексу Украіны. Гэтую версію пазней паўтарыў і Пуцін.
