У канцы траўня ў расійскім Уладзівастоку была атакаваная супрацоўніца прадстаўніцтва Еўрапейскага саюза ў Расіі. Паводле інфармацыі Der Spiegel, нападнікамі, як мяркуецца, былі супрацоўнікі расійскіх спецслужбаў.
Паведамляецца, што дыпламатка з Румыніі знаходзілася ў камандзіроўцы і раніцай 26 траўня пайшла на шпацыр, калі побач спыніўся аўтамабіль, з якога выйшлі двое мужчын. Яны пагражалі жанчыне, пасля чаго жорстка яе збілі. Пацярпелую экстранна эвакуявалі з краіны.
Інцыдэнт выклікаў занепакоенасць сярод заходніх дыпламатычных колаў у Маскве. ЕС выказаў афіцыйнае абурэнне, выклікаўшы прадстаўніка Расіі ў Бельгіі для тлумачэнняў.
На фоне канфлікту ва Украіне дыпламатычныя прадстаўніцтвы краін ЕС у РФ усё часцей сутыкаюцца з правакацыямі і арганізаванымі акцыямі ля сваіх сцен, ініцыяванымі праўладнымі групамі, адзначае выданне.