Ізраіль завяршыў падрыхтоўку да магчымай ваеннай аперацыі на тэрыторыі Ірана, паведамілі некалькі крыніц CBS News. Амерыканскія ўлады, якія атрымалі адпаведную інфармацыю, пачалі рабіць прэвентыўныя захады: Дзярждэпартамент распарадзіўся вывезці неэкстранны персанал з Ірака, а Пентагон дазволіў сем’ям вайскоўцаў добраахвотна пакінуць краіны Блізкага Усходу. Прычына — рызыка ўдару ў адказ з боку Ірана па амерыканскіх аб’ектах у рэгіёне ў выпадку пачатку баявых дзеянняў.
Прэзідэнт Дональд Трамп ў сераду ўвечары на мерапрыемстве ў цэнтры Кенэдзі пацвердзіў, што грамадзян ЗША папярэдзілі пра магчымую пагрозу, адзначыўшы: «Гэта можа стаць небяспечным месцам — паглядзім, што будзе». Пры гэтым ён зноў падкрэсліў пазіцыю Вашынгтона: «Мы не дазволім Ірану стварыць ядзерную зброю».
Нягледзячы на рост напружанасці, афіцыйны прадстаўнік ЗША пацвердзіў, што спецпрадстаўнік па Блізкім Усходзе Стыў Уіткаф усё яшчэ збіраецца сустрэцца з іранскім бокам у рамках шостага раўнда перамоваў па ядзернай праграме. Аднак пазіцыі бакоў застаюцца далёкія ад кампрамісу: Трамп настойвае на поўнай адмове Ірана ад узбагачэння ўрану, а Тэгеран адхіляе такія ўмовы.
Міністар абароны Ірана Азіз Насірзадэ заявіў, што ў выпадку правалу перамоваў і пачатку канфлікту Корпус вартавых ісламскай рэвалюцыі нанясе ўдары па ўсіх амерыканскіх базах у краінах рэгіёна. Такая заява прагучала на фоне дапушчэнняў, што Ізраіль можа пачаць аперацыю самастойна, але яе эфектыўнасць будзе абмежаваная без удзелу ЗША.
Паводле інфармацыі крыніц CBS News, амерыканская адміністрацыя разглядае варыянты ўскоснай падтрымкі Ізраіля — уключаючы разведдадзеныя і дазапраўку самалётаў у паветры. Аднак удзел стратэгічных бамбавікоў B-2, здольных разбурыць умацаваныя падземныя аб’екты ў Форда і Натанзе, малаімаверны. Без іх Ізраілю будзе складана нанесці крытычны ўдар па ядзернай інфраструктуры Ірана.
Калі ж пачнецца абмен ударамі, ЗША гатовыя задзейнічаць сродкі СПА для абароны Ізраіля, як гэта ўжо адбывалася падчас кароткачасовых эскалацый паміж краінамі ў красавіку і кастрычніку 2024 года.
На фоне росту пагрозы Вялікабрытанія праз Марскую гандлёвую арганізацыю папрасіла судны быць асабліва асцярожнымі ў Персідскім заліве, Армузскім праліве і Аманскім заліве — найважнейшых водных шляхах для сусветнага нафтавага гандлю.
Ізраільскія і амерыканскія афіцыйныя асобы пакуль устрымліваюцца ад каментароў. Аднак аналітыкі адзначаюць, што абвастрэнне можа сарваць перамоўны працэс і справакаваць новы віток дэстабілізацыі на Блізкім Усходзе, асабліва ўлічваючы, што Міжнароднае агенцтва атамнай энэргіі нядаўна зафіксавала значнае павелічэнне запасаў урану ў Іране, узбагачанага да 60% — небяспечнай блізкасці да ўзроўню, неабходнага для стварэння ядзернай боегалоўкі.