«Белавія» пачала выконваць рэйсы ў Дубай без тэхпасадкі — цяпер яны праводзяць у дарозе на тры гадзіны менш, паведаміла авіякампанія.
«У сувязі з адкрыццём новых участкаў паветранай прасторы краін, праз якія пралягае маршрут з Мінска ў ААЭ, „Белавія“ змагла адмовіцца ад тэхнічнай пасадкі», — расказаў перавозчык.
Цяпер рэйс Мінск — Дубай — Мінск ажыццяўляецца па «бяспечным і карацейшым маршруце»: палёт займае 6 гадзін 30 хвілін.
Нагадаем, пасля таго як Іран закрыў неба праз эскалацыю канфлікту на Блізкім Усходзе, авіякампанія не адмовілася ад рэйсаў у Дубай, але да нядаўняга часу выконвала іх у аблёт і з тэхнічнай пасадкай у Ташкенце для дазапраўкі. Час у дарозе складаў 9 гадзін 30 хвілін.
Найбліжэйшы рэйс Мінск — Дубай запланаваны на нядзелю, 29 чэрвеня.