Адной з прычын, з якой Сяргей Ціханоўскі завёў YouTube-канал «Краіна для жыцця», стаў старадаўні дом XIX стагоддзя ў вёсцы Агародня Гомельская Добрушскага раёна. Ціханоўскі купіў яго ў 2017 годзе і марыў ператварыць у турыстычны аб’ект, але ўзнікла праблема. Дом — гістарычна-культурная каштоўнасць, таму без дазволу чыноўнікаў мяняць тут нічога нельга. Бюракратыя прыкметна тармазіла рамонт, у выніку за два з паловай гады з моманту куплі тады яшчэ прадпрымальнік Ціханоўскі толкам так і не змог прывесці нерухомасць у парадак і ў сваіх роліках пачаў расказваць пра абыякавасць чыноўнікаў і іншыя праблемы ў краіне. «Люстэрка» даведалася, што цяпер са старым домам, з якога, можна сказаць, і пачаўся прыход Ціханоўскага ў палітыку.
У інтэрв'ю 2017 года Сяргей Ціханоўскі расказваў, што паводле тагачаснага курсу Нацбанка нерухомасць яму абышлася ў 2200 даляраў. У той час проста прадпрымальнік Ціханоўскі марыў ператварыць яе ў турыстычны аб’ект: на другім паверсе зрабіць «нешта накшталт гатэля ці хостэла», на першым — «кавярню ці крамку». Мясцовыя жыхары спадзяваліся, што ўсё гэта дапаможа адрадзіць практычна абязлюдзелую вёску. Ажыццявіць задуманае замінала бюракратыя.
— Разумееш, які прыкол? У прадпрымальніка могуць, а — скончыцца «бабкі», б — знікнуць жаданне нешта рабіць. Разумееш? Бо ўсё гэта (рэканструкцыя. — Заўв. рэд.) цягнецца два з паловай гады — і нічога няма. Толькі дах памяняў, і тое толькі таму што [стары] абваліўся. Любая ініцыятыва спыняецца, — у сакавіку 2019-га апісваў сітуацыю з сядзібай Сяргей. — [Бурная дзейнасць] паволі вычэрпваецца.
У сакавіку 2019-га Сяргей Ціханоўскі завёў YouTube-канал «Краіна для жыцця», каб расказваць пра безгаспадарлівасць і карупцыю ў краіне. Адным з першых было акурат відэа пра той самы дом.
З таго часу шмат што змянілася. Прадпрымальнік заявіў пра жаданне стаць прэзідэнтам, быў асуджаны на 19,5 года пазбаўлення волі, амаль пяць гадоў праседзеў у адзіночцы, перш чым быў вызвалены. А дом яшчэ стаіць. Знайсці яго актуальныя здымкі нам не ўдалося. Аднак у лістападзе 2023-га ён трапіў на кадры аўтара YouTube-канала «Не шукай сэнс…».
Пад выглядам мінчанкі, якая хацела б купіць пусты будынак, журналістка «Люстэрка» патэлефанавала ў Кармянскі сельскі савет, да якога належыць вёска Агародня Гомельская. Там паведамілі, што дом не прадаецца, бо ў яго ёсць уладальнік.
— У любым выпадку вы вырашаеце гэтае пытанне з уласнікам, — удакладнілі ў сельсавеце.
— А ці можна ўладальніка знайсці, каб звязацца?
— Гэта дом [чалавека], якога прэзідэнт нядаўна памілаваў. Ціханоўскага. Ён знаходзіцца ў Літве. Не ведаю, ці ёсць давераныя людзі ў гэтага чалавека. Магу толькі сказаць, што на дом накладзены арышт за нявыплату штрафаў. У любым выпадку без дазволу судовых выканаўцаў наўрад ці вы вырашыце гэтае пытанне.
Нагадаем, у ліпені 2023-га на таргах прадалі мінскую кватэру Сяргея і Святланы Ціханоўскіх. У аўкцыёне ўдзельнічалі два чалавекі. У выніку 66 «квадратаў», дзе былі прапісаныя і дзеці пары, купілі больш чым за 203 тысячы рублёў.
Двума гадамі раней, калі праходзіў суд «па справе Ціханоўскага», яго фігурантаў, сярод якіх былі Мікалай Статкевіч, Ігар Лосік, Арцём Сакаў, Дзмітрый Папоў і Уладзімір Цыгановіч, абавязалі выплаціць 2,5 мільёна рублёў кампенсацыі. У судовым рашэнні гаварылася, што гэтыя грошы пойдуць «для выплат супрацоўнікам Міністэрства ўнутраных справаў за дадатковы час на службе падчас паслявыбарчых пратэстаў».
Чытайце таксама
