Гамяльчанка хацела атрымаць дублікат пасведчання пра нараджэнне для свайго 24-гадовага сына, які жыве за мяжой. Аднак у ЗАГСе жанчыне адмовілі, паведамляе belkagomel.by.
«Сыну 24 гады, жыве за мяжой. Згубіў сваё пасведчанне пра нараджэнне і папрасіў мяне тэрмінова атрымаць у ЗАГСе яго дублікат. Там адмовілі са спасылкай на закон пра персанальныя звесткі і тое, што такія дакументы выдаюцца бацькам толькі няпоўнагадовых дзяцей. Ці правамерная адмова?» — спытала гамяльчанка Ірына.
У Савецкім ЗАГСе Гомеля ёй адказалі, што запісы актаў грамадзянскага стану змяшчаюць асабістую інфармацыю і абароненыя законам, таму доступ да іх абмежаваны, а правілы атрымання паўторных сведчанняў рэгулююцца артыкулам 202 Кодэкса пра шлюб і сям’ю.
З 1 студзеня 2025 года паўторнае пасведчанне пра нараджэнне выдаецца:
- асобам, на якіх складзены запіс акта;
- бацькам, апекунам і папячыцелям дзяцей да 18 гадоў;
- апекунам недзеяздольных.
Паўторнае пасведчанне таксама можна атрымаць па даверанасці, натарыяльна засведчанай у вызначаным заканадаўствам парадку.
Нагадаем, у 2023 годзе Лукашэнка падпісаў указ, паводле якога беларусы за мяжой не могуць атрымаць пашпарт у консульстве, а аформіць многія дакументы дазваляецца толькі пасля асабістай яўкі або па даверанасці, выдадзенай у Беларусі.
Для атрымання дубліката трэба падаць:
- заяву;
- пашпарт ці іншы дакумент, які сведчыць асобу;
- дакументы пра змену прозвішча ці іншых звестак (калі ёсць);
- пацверджанне аплаты (адна базавая велічыня).
«Такім чынам, паколькі ваш сын поўнагадовы, ён мусіць самастойна звярнуцца па дублікат пасведчання пра нараджэнне альбо аформіць натарыяльную даверанасць на вас для атрымання дакумента ад яго імені. Адмова ЗАГСа, які спасылаецца на закон пра персанальныя звесткі і абмежаванні для бацькоў поўнагадовых дзяцей, адпавядае заканадаўству», — заявілі ў ЗАГСе Савецкага раёна Гомеля.