Былы беларускі палітвязень Сяргей Ціханоўскі на наступны дзень пасля свайго вызвалення даў інтэрв'ю Associated Press. Ён расказаў новыя падрабязнасці пра сваё знаходжанне ў зняволенні, пагрозы супрацоўнікаў турмы і паразважаў пра будучыню Аляксандра Лукашэнкі.
Са словаў Сяргея Ціханоўскага, за час адзіночнага зняволення ён «амаль забыў, як гаварыць»: яго трымалі ў поўнай ізаляцыі, адмаўлялі ў медыцынскай дапамозе і не давалі дастаткова ежы.
— Калі б вы бачылі: мне на талерку кідалі ўсяго дзве лыжкі кашы — дзве маленькія лыжкі. Часам мне давалі маленькі цюбік зубной пасты, кавалачак мыла — як падачку. Часам давалі, часам — не, — расказаў блогер, дадаўшы, што не мог нічога купіць у турэмнай краме.
Ён дадаў, што знаходжанне ў зняволенні было «адназначна катаваннем»:
— Супрацоўнікі турмы ўвесь час паўтаралі: «Ты прабудзеш тут не толькі 20 гадоў, якія мы табе ўжо далі. Мы асудзім цябе зноў». Яны казалі: «Ты ніколі не выйдзеш». І ўвесь час паўтаралі: «Ты тут памрэш».
Ён зноў падзякаваў за сваё вызваленне прэзідэнту ЗША Дональду Трампу:
— Яны (беларускія ўлады. — Заўв. рэд.) хочуць, каб Трамп хоць трохі дзесьці пайшоў ім насустрач. Яны гатовыя адпусціць іх (палітвязняў. — Заўв. рэд.) усіх. Усіх!
Цяпер экс-палітвязень плануе прайсці медыцынскае абследаванне ў Літве праз пагаршэнне здароўя за кратамі. Ён падкрэсліў, што холад і голад былі «галоўнымі прычынамі хваробаў», якія закранулі амаль усіх палітвязняў у Беларусі, што ўтрымліваліся ў «асабліва цяжкіх умовах».
— Былі скурныя захворванні, ва ўсіх былі праблемы з ныркамі праз холад — і ніхто толкам не разумеў, што адбываецца. У мяне ішла кроў з рота, з носа. Часам бывалі курчы — але гэта ўсё ад жудаснага холаду, калі сядзіш у карцары. У турме няма ніякай медыцынскай дапамогі — наогул ніякай, проста каб вы разумелі, — расказаў Ціханоўскі.
Ён адзначыў, што ўмовы яго ўтрымання трохі палепшыліся пасля смерці расійскага апазіцыянера Аляксея Навальнага ў лютым 2024 года ў калоніі.
— Калі памёр Аляксей Навальны, я падумаў, што, відаць, хутка і я… А потым нешта змянілася. Было ясна, што нехта наверсе сказаў: «Зрабіце так, каб ён тут не памёр. Нам гэтая праблема не патрэбная». Проста стала крыху мякчэй… У нейкі момант прагучала: «Ціханоўскага трэба пакінуць у жывых, а не забіваць», — лічыць блогер.
Ён абвінаваціў прэзідэнта Расіі Уладзіміра Пуціна ў падтрымцы Лукашэнкі як падчас пратэстаў 2020 года, так і сёння, і выказаў рашучую падтрымку Украіне, назваўшы Крэмль агульным злом для абедзвюх краін.
— Калі б не Пуцін, мы б ужо жылі ў іншай краіне. Пуцін прызнаў перамогу Лукашэнкі на выбарах, назваў чорнае белым, — то-бок адмовіўся заўважаць фальсіфікацыі. Яны дапамагаюць адзін аднаму. Праз Пуціна гэтая незаконная ўлада ўсё яшчэ ў Беларусі, — дадаў былы палітвязень.
Ён таксама чарговым разам заявіў, што не збіраецца аспрэчваць ролю сваёй жонкі як міжнародна прызнанай лідаркі беларускай апазіцыі, і заклікаў да адзінства. І дадаў, што «ні пры якіх абставінах» не збіраецца крытыкаваць беларусаў, асуджаць ці скардзіцца на каго-кольвек.
Таксама Ціханоўскі пацвердзіў, што не спыніць барацьбу і хоча вярнуцца да актыўнай працы як палітык і блогер. Пры гэтым ён скептычна ставіцца да дапушчэння, што 70-гадовы Лукашэнка добраахвотна пойдзе ў адстаўку, нягледзячы на ўзрост.
— Я ўжо не ведаю, сыдзе ён ці не. Многія кажуць, што нічога не зменіцца, пакуль ён не памрэ. Але я ўсё яшчэ разлічваю на перамогу дэмакратычных сіл, — сказаў на заканчэнне ён.
Чытайце таксама
