Жыхары аграгарадка Лучнікі, які знаходзіцца зусім побач са Слуцкам, хочуць правесці сабе каналізацыю з горада. За гэта ў іх яшчэ пяць гадоў таму папрасілі 3,9 мільёна рублёў. Вяскоўцы хочуць падтрымкі ад кіраўніка Мінаблвыканкама, які 18 чэрвеня праводзіў прыём грамадзян у Слуцку, піша «Слуцкі край».
Правесці сабе каналізацыю хочуць жыхары вуліцы Надрэчнай у Лучніках (мяркуючы з карты, вуліца ўпіраецца ў мяжу горада Слуцка). Яшчэ ў 2020 годзе яны звярнуліся ў «Водаканал» з просьбай пабудаваць каналізацыю. Праект ужо распрацаваны, але кошт 807 метраў каналізацыі складае 3,9 мільёна рублёў (110 тысяч рублёў з домаўладання, або больш за 4,8 тысячы рублёў за метр «трубы»).
Жыхар Лучнікаў Алег Александровіч папрасіў Кушнарэнку дапамагчы знізіць кошт. Праект яшчэ ўключае магчымасць падключэння і мясцовай школы. Чыноўнік паабяцаў даручыць гэта «кампетэнтным службам».
«Нават калі браць з пункту гледжання будаўніцтва: выгаднейшы адкрыты або закрыты спосаб, хто будзе гэтым займацца: дзяржаўнае прадпрыемства або прыватнік? Ці вы самі выканаеце зямельныя працы? Яны часам сягаюць 30% кошту ўсіх работ. Карацей, вельмі шмат нюансаў. Будзем разам шукаць варыянты», — адказаў кіраўнік Мінаблвыканкама.
Пытанні каналізацыі хвалявалі не толькі жыхароў прыгарада, але і гараджан. Так, уладальнікі дамоў у 3-м завулку Жукоўскага (за 2,5 км ад вуліцы Надрэчнай) незадаволеныя працай водаканала — там адмаўляюцца абслугоўваць акурат каналізацыю, пабудаваную мясцовымі.
Паводле дзвюх случчанак, труба пастаянна забіваецца, а водаканал ігнаруе заяўкі, патрабуючы спачатку гарантыйны ліст і аплату. Прычым жыхары прасілі ЖКГ узяць каналізацыю на баланс, але сутыкнуліся з вялікімі складанасцямі ў падрыхтоўцы дакументаў. У выніку гендырэктар ЖКГ Мінскай вобласці Юрый Кукашук паабяцаў правесці рэвізію трубаправода і калектара.