Аляксандр Лукашэнка на ўрачыстым сходзе з нагоды Дня незалежнасці заявіў, што спецпасланнік ЗША Кіт Келаг падчас іх чэрвеньскай сустрэчы ў Мінску паабяцаў яму «папрацаваць» над спыненнем дронавых атак Украіны на Расію. Амерыканскі палітык у сябе ў сацсетцы абверг гэта сцверджанне, назваўшы яго вырваным з кантэксту.
Напярэдадні Аляксандр Лукашэнка, выступаючы на ўрачыстым сходзе з нагоды Дня незалежнасці, расказаў пра перамовы са спецпасланнікам прэзідэнта ЗША. Паводле Лукашэнкі, ён давёў да амерыканскага боку пазіцыю прэзідэнта Расіі Уладзіміра Пуціна наконт магчымасці перамір'я ва Украіне, для пачатку хаця б у паветры.
Лукашэнка перадаў Келагу патрабаванне Пуціна наконт атак дронаў УСУ на Расію. Паводле яго, у Пуціна на гэты конт ёсць адно дакладнае патрабаванне.
«„Няхай яны (на Захадзе. — Заўв. рэд.) скажуць свайму падначаленаму Зяленскаму, каб ён не наносіў па Расіі ўдары. Тады мы пагодзімся“». Вось гэтую пазіцыю да амерыканцаў давёў. І кажу: і што тут дрэннага? Мы папрацуем, кажа (прадстаўнік ЗША. — Заўв. рэд.), у гэтым кірунку", — сказаў Лукашэнка.
Кіт Келаг заявіў, што ягоную цытату Лукашэнка вырваў з кантэксту.
«Гэтая цытата вырваная з кантэксту. У размове з Лукашэнкам мы абмяркоўвалі поўнае і безумоўнае спыненне агню. Любыя абмежаванні ў дзеяннях Кіева разглядаліся толькі пры ўмове ўзаемных крокаў з боку Масквы. Я ні ў які момант не рабіў заяваў што да вядзення вайны Украінай па-за рамкамі агульнага спынення агню», — напісаў Келаг.
Нагадаем, 21 чэрвеня Лукашэнка і Келаг правялі перамовы, якія доўжыліся 6,5 гадзіны. Бакі абмеркавалі шырокае кола пытанняў, уключаючы санкцыйны ціск ЗША і ЕС, эскалацыю канфліктаў ва Украіне і на Блізкім Усходзе, а таксама развіццё адносін Мінска з Расіяй і Кітаем.
Пасля гэтай сустрэчы на волю выйшлі 14 чалавек. Сярод іх быў і палітвязень Сяргей Ціханоўскі, які прабыў у зняволенні больш за пяць гадоў.