Увосень у Беларусі пройдуць сумесныя з Расіяй вайсковыя вучэнні «Захад-2025». За імі пільна сочаць у NATO, ацэньваючы колькасць удзельнікаў у 100 тысяч чалавек. 23 чэрвеня генеральны сакратар альянсу Марк Рутэ расказаў журналістам, што будзе, калі Расія вырашыць напасці на краіны NATO, скарыстаўшыся вучэннямі «Захад-2025».
Напярэдадні саміту NATO, які пройдзе ў Гаазе 24−25 чэрвеня, генеральны сакратар арганізацыі Марк Рутэ сустрэўся з журналістамі. Адно з пытанняў датычыла сумесных беларуска-расійскіх вучэнняў «Захад-2025». Журналісты «Белсата» ўдакладнілі, ці бачыць NATO рэальную пагрозу ўварвання Расіі ва Украіну і краіны Балтыі з тэрыторыі Беларусі падчас вучэнняў.
— Альянс сёння настолькі моцны, што калі б Расія і паспрабавала нешта зрабіць, там ведаюць: нашая рэакцыя будзе зруйнавальнай, — адказаў генеральны сакратар NATO. — Таму было б вельмі неразумна з боку Уладзіміра Пуціна ці яго памагатага ў Беларусі (маецца на ўвазе Аляксандр Лукашэнка. — Заўв. рэд.) пачынаць што-небудзь супраць нас.
Марк Рутэ таксама расказаў, што адна з мэтаў саміту NATO ў Гаазе — выпрацоўка рашэння пра павелічэнне выдаткаў на абарону ўсімі краінамі — удзельніцамі альянсу.
— Праз змяненне сітуацыі ў сферы бяспекі нам давядзецца выдаткоўваць больш. Каб, калі прагучыць заклік да кожнага з нашых саюзнікаў зрабіць свой уклад у агульную справу — абарону кожнай цалі тэрыторыі NATO, — кожны быў гатовы, узяўшы на сябе абавязанні не толькі на паперы, але і ў рэальнасці, — заявіў ён.
Генеральны сакратар альянсу запэўніў журналістаў, што NATO ўжо сёння гатовае выкарыстаць пяты артыкул свайго статута. Гэты артыкул абвяшчае, што напад на адну з краін-удзельніц будзе расцэньвацца як напад на ўсю арганізацыю.
— У нас ёсць гатовыя планы, структуры, сістэмы камандавання і кіравання, каб гарантаваць, што мы можам неадкладна задзейнічаць патэнцыял, які кожная краіна мае на індывідуальным узроўні, — заявіў Рутэ. — У выпадку нападу на нас кожная краіна NATO скіруе свой патэнцыял на агульныя намаганні.
Нагадаем, беларуска-расійскія вайсковыя вучэнні «Захад-2025» пройдуць на тэрыторыі нашай краіны ў верасні 2025 года. У 2021 годзе ў аналагічных манеўрах былі задзейнічаныя каля 200 тысяч чалавек. У красавіку 2025-га высокапастаўлены чыноўнік NATO расказаў «Люстэрку», што, паводле інфармацыі альянсу, у «Захадзе-2025» возьме ўдзел 100 тысяч вайскоўцаў. У канцы траўня міністр абароны Беларусі заявіў пра перанос вучэнняў з межаў ЕС углыб краіны і змяншэнне колькасці ўдзельнікаў.
Чытайце таксама
