З 1 ліпеня частка беларусаў, якія атрымліваюць пенсіі, дапамогі на дзяцей і некаторыя іншыя сацыяльныя выплаты праз банкі, можа застацца без гэтых сродкаў. Прычына — чыноўнікі ўвялі патрабаванне да гэтай даты адкрыць спецыяльныя рахункі, якія называюцца базавымі разліковымі. На іх і будуць пералічваць грошы. Але падаць заяўкі ў банкі на адкрыццё такіх рахункаў трэба да 20 чэрвеня ўключна. Калі пазней, то ў ліпені можна застацца без сацыяльных выплат.
Што мяняецца
Да 1 ліпеня 2025 года беларусы, якія атрымліваюць пенсіі праз банкі, павінныя абзавесціся спецыяльнымі рахункамі, якія называюцца базавымі разліковымі, папярэджваюць сацслужбы. На іх і будуць пералічваць грошы.
Гэтаму новаўвядзенню папярэднічалі іншыя. Па-першае, з 1 ліпеня 2022 года ў Беларусі ўвялі патрабаванне адкрываць базавыя разліковыя рахункі для тых, хто з гэтай даты выходзіць на пенсію і будзе атрымліваць адпаведную выплату праз банкі.
Па-другое, з 1 ліпеня 2024 года ўлады скарацілі спіс тых, каму гэтыя выплаты могуць бясплатна пералічваць праз пошту, і пашырылі пералік тых, каму гэта робяць праз банкі.
У якіх банках можна адкрыць рахунак?
Адкрыць базавы рахунак можна як у той фінустанове, у якой цяпер абслугоўваецца чалавек, так і выбраць з пэўнага спісу. У гэты пералік уваходзяць «Белаграпрамбанк», «Беларусбанк», «Банк БелВЭБ», «Белгазпрамбанк», «Белінвестбанк», «Банк Дабрабыт», «МТБанк», «Прыёрбанк», «Сбер Банк», «Тэхнабанк».
Чым базавы рахунак адрозніваецца ад бягучага?
Асноўная розніца — базавы прадугледжвае пэўны спіс аперацый, з правядзення якіх банкі не бяруць камісію. Да прыкладу, гэта адкрыццё і закрыццё такога рахунку, залічэнне на яго сацыяльных выплат (пенсій, дапамог на дзяцей, выплат па беспрацоўі, стыпендый і іншых), пераводы паміж такімі рахункамі, зняцце наяўных праз банкаматы і касы гэтага ж банка, разлікі за тавары.
Чытайце таксама
