Беларус, які працуе дальнабойшчыкам у польскай фірме, расказаў у TikTok, што ягоны заробак ідэальна пасуе для выдаткаў на радзіме. Аднак з такімі даходамі жыць у ЕС, на яго думку, — прыкладна тое самае, што ў Беларусі з нашымі заробкамі.
Беларус расказаў, што спачатку разважаў, куды ісці працаваць — у Расію, Еўрасаюз ці «на СНД». У выніку абраў ЕС, дзе працуе ўжо 2,5 года. Ён расказвае ў відэа, што атрыманыя за мяжой грошы траціць на радзіме, дзе жыве ягоная сям’я.
Мяркуючы з ролікаў, мужчына зарабляе каля 2,5 тыс. еўра на месяц (гэта амаль 8,6 тыс. рублёў паводле курса Нацбанка на 18 чэрвеня). «Я проста працую ў польскай фірме, бо, катаючыся па Еўропе, можна больш зарабіць», — расказаў дальнабойшчык у яшчэ адным відэа.
Паводле яго, у фірме, дзе ён працуе, кіроўцы зарабляюць максімум да 3 тыс. еўра. «Ты палякам раскажы, што за 2500 еўра можна ў Польшчы добра жыць, не кажучы ўжо пра Германію», — кажа беларус. У той жа час ён удакладняе, што, атрымліваючы еўрапейскі заробак, на радзіме ён можа сабе дазволіць «даволі добры ўзровень жыцця».
Таксама дальнабойшчык удакладніў, што «гэта не значыць, што ў Еўропе такія вялікія заробкі».
«Некаторыя думаюць, што калі паедуць жыць на пастаянку ў Еўропу і будуць працаваць на заводах ці дзесьці яшчэ, кіроўцамі, будуць атрымліваць такі вялікі заробак і будуць жыць у шакаладзе. Сутнасць гэтых заробкаў — прывозіць польскі заробак дадому ў Беларусь. І выдаткоўваць яго на тавары ў Беларусі. Калі ты будзеш зарабляць у Польшчы ці дзесьці ў Еўропе [і там жа выдаткоўваць] гэтыя добрыя грошы, гэта будзе тое самае, што жыць у Беларусі за беларускі заробак», — працягнуў ён.
Пры гэтым у іншым відэа кіроўца прызнаўся, што не хацеў бы жыць у Еўропе, бо для пастаяннага жыцця яму гэты рэгіён не падыходзіць. Адна з прычын — «брудныя вуліцы», а яшчэ — разыходжанне ў культурных каштоўнасцях з еўрапейцамі. У будучыні, «калі тут не складзецца», ён гатовы працаваць у РФ. З ягоных словаў, нібыта «многія сыходзяць з Еўропы і пераходзяць на Расію і радуюцца гэтаму выбару».
Вы згодныя, што ўзровень заробкаў і кошту жыцця ў Беларусі і еўрапейскіх краінах параўнальны з улікам розніцы цэн? Калі вы працуеце ў еўрапейскіх краінах або жывяце там, падзяліцеся сваім досведам і меркаваннем @zerkalo_editor.
