Праз жорсткі закон пра забарону абортаў у амерыканскім штаце Джорджыя некалькі месяцаў трымалі на ШВЛ 30-гадовую Адрыяну Сміт, чый мозг памёр у пачатку цяжарнасці ад трамбозу. Гэта адбылося ўжо пасля таго, як у дзіцяці ва ўлонні зафіксавалі дзейнасць сэрца. У чэрвені 2025-га яно з’явілася на свет, а саму Сміт праз некалькі дзён планавалі адключыць ад апарата жыццезабяспечання, паведамляе NBC News.
Дзіця з’явілася на свет з дапамогай кесарава сячэння ў пятніцу, 13 чэрвеня. Гэта хлопчык.
Паколькі дзіця нарадзілася значна раней за тэрмін (вядома, што ў сярэдзіне траўня Сміт была на 21-м тыдні цяжарнасці; звычайна яна доўжыцца каля 40 тыдняў), яго вага склала крыху больш за 820 грамаў. Цяпер хлопчык знаходзіцца ў аддзяленні інтэнсіўнай тэрапіі для нованароджаных, каб адужэць.
Маці памерлай Адрыяны Сміт і бабуля нованароджанага Эйпрыл Ньюкірк расказала, што дзіцяці ўжо прыдумалі імя — Чэнс. З англійскай яго можна перакласці як «шанец».
Чаму дактарам давялося зрабіць кесарава менавіта цяпер, каб дзіця з’явілася на свет, невядома. Але раней паведамлялася, што дактары непакоіліся праз стан плода: у яго выявілі вадкасць у мозгу, што магло б выклікаць цяжкія ўскладненні. Пасля таго як хлопчык з’явіўся на свет, падрабязнасці пра яго здароўе не раскрываліся.
— Чакаецца, што ўсё будзе ў парадку. Ён проста змагаецца [за жыццё]. Мы хочам, каб за яго памаліліся. Проста маліцеся за яго, — папрасіла Ньюкірк, бабуля хлопчыка.
Што да самой Сміт, то яе мусілі адключыць ад ШВЛ ў аўторак, 17 чэрвеня, паводле словаў Ньюкірк. Аднак у гэты дзень яна не давала каментароў амерыканскім выданням. Аяна Прэслі — сябра Палаты прадстаўнікоў ЗША — пацвердзіла ў сваім Instagram, што Сміт сапраўды адключылі ад ШВЛ. Акрамя нованароджанага хлопчыка ў той таксама застаўся старэйшы сын Чэйз.
Нагадаем, у лютым 2025 года жыхарку штата Джорджыя Адрыяну Сміт прызналі мёртвай праз наступствы трамбозу сасудаў. У яе зафіксавалі смерць мозгу, што юрыдычна прыраўноўваецца да смерці чалавека. Аднак жыццё ў целе жанчыны падтрымлівалі штучна — дзеля выратавання дзіцяці, якім яна была цяжарная.
На думку дактароў, адключэнне ад апарата ШВЛ прывяло б да гібелі плода, што можна прыраўняць да перапынення цяжарнасці, якое забароненае законамі штата. У сувязі з гэтым медыкі не далі яе сям'і вырашыць, што рабіць, баючыся за сваю бяспеку.
«Люстэрка» таксама расказвала, што наконт выкарыстання целаў памерлых жанчын для выношвання цяжарнасці думаюць навукоўцы: пра гэта нават напісаныя навуковыя працы.
Чытайце таксама
